«Kazakh tourism» ҰК» АҚ және Қытайдағы Henan Radio and Television Jinbang Cultural Tourism Industry Development әріптестік орнатты. Ынтымақтастық туралы меморандумға қос компанияның басшылары Қайрат Сәдуақасов және Мин Хуйдун қол қойды.

Тараптар Қазақстанда мәдени туризмді дамытуға бағытталған жобаны жүзеге асыру мүмкіндігін талқылады. Оның аясында басымдық қазақтың ұлттық мәдениеті мен тарихына берілмек.

Тараптар 3 бағыт бойынша күш-жігерді біріктіруге уағдаласты: саладағы әріптестікті дамыту, елдер арасында туристік индустрияны бірлесе ілгерілету және кәсіби тәжірибемен өзара алмасу.
Меморандум аясында екі мемлекеттің туристік, мәдени және спорттық нысандарын ілгерілету жолында тың жобалар ұйымдастыру діттеліп отыр.

2024 жыл Қытайдағы Қазақстан туризмі жылы ретінде белгіленгендіктен, меморандумға қол қоюдың ерекше мәні бар. Биыл аспан асты елінен келген туристер қатары бірнеше есе артты. 2023 жылғы қарашадан бастап Қазақстан мен Қытай арасында өзара визасыз режим енгізілді.

Атап өткен жөн, Henan Radio and Television Jinbang Cultural Tourism Industry Development компаниясы Қытайда мәдени туризм бағытында ірі жобаларды жүзеге асырумен айналысады. Оның ішінде ҚХР тарихи-мәдени мұрасын жастар арасында насихаттау мақсатында тақырыптық театр мен көп алаңды театр кеңістігі құрылған.